နဲဂွံပ္တိုန် Windows7 ပ္ဍဲစက်ကောန်ပျူတာ Mac

ညးမသုၚ်စောဲမံၚ် Mac ကောန်ပျူတာတံလေဝ် ညံၚ်ဂွံသုၚ်စောဲ Windows ပ္ဍဲစက်ဇကုမာန်ကီုဂှ် နူကဵု Apple တေံပ္တိတ်လဝ်ကဵု Tool မွဲမၞုံယၟု Boot Camp ရဟွံသေၚ်ဟာ။ လ္ၚဵုတံဂှ် ဟွံသုၚ်စောဲ Boot Camp တုဲ သုၚ်စောဲ Software တၞဟ်ဟ်မွဲ ညံၚ်ရဴ Parallels, VMWare Fusion တံတုဲ Run မံၚ် Windows ပ္ဍဲစက် Mac ဇကုဂှ်လေဝ်နွံရ။ ဆဂး သုၚ်စောဲ Parallels, VMWare Fusion တံဂှ် ပ္ဍဲမွဲအခိၚ်ဓဝ် ဍေံသ္ဒးကၠောန်ကမၠောန် သီု OS ၜါရ၊ မုဟိုတ်ရောတှေ် ပ္ဍဲ OS Mac ဂှ်ဟေၚ် ပိုဲသ္ဒးပ္တိုန် VMWare Fusion ဂှ်တုဲ ပ္ဍဲလ္တူဍေံဂှ်ဟေၚ် ပိုဲသ္ဒးစကာ Windows OS ဂှ်တှေ် ဍေံဇြိုၚ်လဇုဲညိဏောၚ် ဟီုစဂွံရ။ သုၚ်စောဲ Boot Camp ဂှ်တှေ် အခိၚ်ပိုဲစပံက်ကောန်ပျူတာတေံ OS လဵုပိုဲသုၚ်စောဲရောဂှ် ရုဲကေတ်မာန်တုဲ OS ပိုဲသုၚ်စောဲဂှ်ဟေၚ် ဍေံတိုန်ကၠုၚ်တုဲ ဍေံကၠောန်ကမၠောန်သာညိဏောၚ်။ ဟိုတ်ဂှ်ရတှေ် သုၚ်စောဲ Boot Camp တုဲ ဗီုဂွံပ္တိုန် Windows7 ဂှ် ဆက်လဴအာကဵုရောၚ်။

ဗီုဂွံကၠောန်သ္ပဍေံဂှ်-

[၁] ကိုပ်ကၠာနူဟွံဂွံကၠောန်သ္ပမွဲသာ်ဏီ သွက်ဂွံကျောဝ်ရံၚ် Software Update သွက်စက်ဇကုဂှ် ဍဵုပ္ဍဲ Apple menu တုဲ ဍဵုကဵု Software Update ဂှ်ညိ။ ဟွံသေၚ်မ္ဂး အာပ္ဍဲကဵု Apple's Boot Camp support page တေံတုဲ ကျောဝ်စမ်ရံၚ် Update သွက် model စက်ဇကုတုဲ နွံပၟိက်မ္ဂး Download ကေတ်ထောံညိ။



[၂] Update တုဲဒှ်အိုတ်မ္ဂး သ္ပထောံ Restart စက်ဂှ်မွဲဝါညိ။ ကာလစက်ဂှ် ကလေၚ်တိုန်ကၠုၚ်မ္ဂး Check စမ်ရံၚ် Update မွဲဝါပၠန်ညိ။ Update သွက်စက်ဇကုဟွံမွဲရမှ ဆက်ကၠောန်အာဂတဂှ်မ္ဂး ပြေပြံၚ်ခိုဟ်ရ။

[၃] မိက်ဂွံဗ္ကန်မွဲပၠန်ဂှ် ကမၠောန်မ္ဒးကၠောန်အာဂတဏံဂှ် ဟိုတ်နူစပ်မံၚ်ကဵုပြုပြေၚ်ဗၞတ်ဗ္ၜတ် Hard Drive တုဲ တၚ်နေၚ်ကိစ္စဇၞော်ဇၞော်တံနွံမ္ဂး ချာဲစၠောံစွံလဝ် ဒၞာဲတၞဟ်ဟ်ညိ။ အကြာတရဴကမၠောန်ဏံ ဟိုတ်နူဟိုတ်မွဲမွဲတုဲ ယဝ်လီုအာကဝက်တရဴမ္ဂး တၚ်နေၚ်ကိစ္စဇၞော်ပိုဲတံ ဟွံဒှ်လလေၚ်ရ။

[၄] ပ္ဍဲစက်ကောန်ပျူတာပိုဲ ပံက်လဝ် Application တံနွံမ္ဂး ကၟာတ်ထောံဖအိုတ်ညိ။ တုဲမ္ဂး အာပ္ဍဲကဵု Applications > Utilities တုဲ ဍဵုကဵု Boot Camp Assistant ဂှ်ညိ။

[၅] Boot Camp Assistant မံက်တိုန်ကၠုၚ်တုဲ ဆက်ဍဵုအာကဵု Continue ဂှ်ညိ။



[၆] ယဝ်ရမံက်တိုန်ကၠုၚ်မ္ဂး ရုဲစှ်ကေတ် Download the Windows support software for this Mac ဂှ်ညိ။ Software ဏံဟေၚ် ဒှ်သွက်ဍေံဂွံဂၠာဲကဵု Driver သွက် Window ပိုဲပ္တိုန်ဂှ်ရ။ Software ဏံဝွံ ဍေံ Download တုဲမ္ဂး ချာဲပ္တိတ်ကေတ်လဝ် နကဵု Flash Drive ဟွံသေၚ်မ္ဂး CD ညိ။ တုဲဒှ်မ္ဂး သွက်ဂွံဆက်အာဂတဂှ် ဍဵုကဵု Continue ဂှ်ညိ။

[၇] သွက်ဍေံဂွံစုတ် Windows ဂှ် ပါ်ကရေက်ကဵုဍေံ Partition ၜိုတ်ထေက်ကြိုက် လ္တူနူ 16GB ညိ။ တုဲဒှ်မ္ဂး ဍဵုကဵုဍေံ Partition ဂှ်ညိ။ ဍေံစစဳရေၚ်ဒၟံၚ် Partition တုဲ ဒးမၚ်အခိၚ်လံညိ ဒှ်မာန်ရ။



[၈] တၞးဓါတ် DVD Windows7 ပိုဲဂှ် စုတ်ပ္ဍဲစက်ပိုဲတုဲ ဍဵုကဵု Start Installation ဂှ်ညိ။ စက်ပိုဲ Restart အာတုဲ ဍေံကလေၚ်တိုန်မ္ဂး ဍေံစစုတ်ပ္တိုန်အာ Windows7 ဂှ်ရ။ ကၠောန်အာအတိုၚ်လၟေၚ်ၚ် ညံၚ်ရဴပိုဲပ္တိုန်မံၚ် Windows ပ္ဍဲ PC တေံကီုရ။



[၉] စိုပ်ဒၞာဲရုဲစှ် Partition ဂှ်မ္ဂး စွံသတိတုဲ ရုဲစှ်ကေတ် Partition မၞုံကဵုယၟု bootcamp တၞုၚ်ဂှ်တုဲ Format ထောံဍေံ နကဵုသၞောတ် NTFS ညိ။



[၁၀] ကာလပ္တိုန် Windows7 ဂှ်တုဲမ္ဂး သွက်ဂွံပ္တိတ်တၞးဓါတ် DVD Windows7 ဂှ် ယဝ်ရကောန်ဍေၚ်ပ္တိတ် DVD ဂှ်ဟွံကၠောန်ကမၠောန်မ္ဂး အာပ္ဍဲ Computer > DVD RAM ဍဵု Right-Click တုဲ ဍဵုကေတ် Eject ဂှ်ညိ။

[၁၁] တုဲမ္ဂး သွက်ဂွံစုတ် Driver စက်ပိုဲဂှ် Flash Driver ဟွံသေၚ်မ္ဂး CD ပိုဲမချာဲကေတ်လဝ် နူပြဟ်ဟ်(လၟေၚ်-၆)တေံဂှ် စုတ်ပ္ဍဲစက်ပိုဲညိ။ ပံက်ဍေံတုဲ ဍဵုကဵု Setup နွံမံၚ်ပ္ဍဲ Boot Camp folder ဂှ်ညိ။ ကာလဂှ်မ္ဂး ဍေံစစုတ်ဒၟံၚ် Driver နာနာတုဲ အကြာကြာဂှ် ဍေံမံက်တိုန်မွဲမွဲသာ်မ္ဂး ဍဵုကဵု Continue Anyway ဂှ်ညိ၊ ဆလအ်လေဝ် လ္ပဍဵု Cancel ညိ။ ဍေံစုတ်တုဲအိုတ်မ္ဂး Restart ထောံစက်ကောန်ပျူတာပိုဲညိ။ ကိစ္စစုတ်ပ္တိုန် Windows7 ပ္ဍဲ Mac ဂှ် တုဲဒှ်အိုတ်ရ။ [Windows 8 လေဝ် သုၚ်စောဲနဲဏံတုဲ စုတ်ပ္တိုန်ကေတ်မာန်ကီုရ။]

ကာလပိုဲပံက်စက် သွက်ဂွံရုဲ OS လဵုပိုဲသုၚ်စောဲ-
ဍဵုလဝ် Option key တုဲဟေၚ် စပံက်စက်ကောန်ပျူတာဂှ်ညိ။ ကာလဂှ်မ္ဂး တၞးသွက်ဂွံရုဲ OS ဍေံမံက်တ္ိုန်ကၠုၚ်တုဲ Windows ဟာ OS X ဟာဂှ် ဇကုမိက်ဂွံသုၚ်စောဲဂှ် ဍဵုကဵုဍေံ Double-Click ညိ။